تبلیغات
کورد ئیلام - علی اصغر عباسی آرام
کورد ئیلام
ئیلام آلامتو {سرزمین طلوع خورشید}
صفحه نخست       پست الکترونیک          تماس با ما              ATOM            طراح قالب
گروه طراحی قالب من گروه طراحی قالب من گروه طراحی قالب من گروه طراحی قالب من گروه طراحی قالب من
شعر تەخت خان. عەلی ئەسغەر عەباسی ئارام

پەروەردگارا،ئمشەو هەم چەمە؟
حاڵم خوو نیەو دڵم پڕ خەمە
دە سەر تا وە پا گڕەێ نارمە
خەم ئێ دنیا گێشتێ بارمە
نیەزانم ئڕا ئێقە پەشێوم
ئێ بارە چێگە دە بان لێوم
هووش و حەواسم ئڕا بۊە گوم
سەرم چۊ کێشتی هادە تەڵاتوم
نە چۊ جووانی چەو مەسێ دیمە
نە دڵ وە باڵاێ بەردێ بەسیمە
وتم سوو بچم ئڕا شکاڕێ
ئێ خەمە دە بان دڵم درارێ
شکارچی وەختێ شکارێ دۊنێ
دی خەمێ دە بان دڵی نیەمینێ
کڵەشێر شەقە دادە باڵ و پەڕ
دەنگ ئەزانچی وڵات گرتە وەر
دەس نماز گرتم نمازێ خوەنیم
قێ قەتار چۊ دەور جووانی بەنیم
پەنجتیر کووانەگە خسم ئەو شانم
وە خێاڵ خوەم هالی جووانم
ئاسارەێ شەفەق سەر هاوردەو دەر
دنیا ڕووشن کرد وەرشەێ لیسک خوەر
چۊ کووس کەفتگ٘ چۊ ڕەنج بێوەر
کڵاش ئەڵکیشاموو دە ماڵ دامەو دەر
دیم کۊەێ فرەێ ها وەراوەرم
ئێجا تەخت خان هاتە نەزەرم
دە گڵاڵ وازەو ڕاس کیشامەو بان
ڕەسیمە سانێ هادە تەخت خان
شەکەت بۊم نیشتم وە پاێ ئوو سەنگە
دیم دڵگیر دە دەس دنیاێ دو ڕەنگە
وە ئەمر خودا سان هاتەو زووان
وت ڕەفیق بنیش ماڵت بوو وێران
یە ئەڕا کوو چی؟شکار هادە کوو؟
بووِس تا بۊنیم دەوران وە چە دوو
نامەێ ها دەسێ وە حاڵەتێ گەن
ئشارە وەم کرد ئێ نامە بخوەن
خوو کە نووڕسم نامە قەشەنگ بۊ
فەرمانێ دە قەوڵ ئەمیر جەنگ بۊ
جاێ نیشانم دا کەمێ ئەو بان بۊ
سابق تەفریگاێ مەرحووم خان بۊ
کوچگ وت ئارام فامت بکەێ ڕەم
گووش بی دەمتەقەێ خاسێ ئەڕات کەم
بنووڕ وە ئوو تەخت بێ ئێتبارە
ک ئیسە فەقەت شوونێ دیارە
هە دە شەوەکی تا وە ئێوارە
جەم دبۊن وە دەور ئەبووقەدارە
پەری پەێکەرێ زڵفێ تاڵ تاڵ بۊ
هەر تاڵێ ئافەت یەێ بنە ماڵ بۊ
یەێ ئاهوو چەمێ سخمە نارنجی
ڵێو چۊ پەڕەێ گوڵ و دنان برێنجی
تا دخسەو بان ئەبروو کەمانێ
ت دە شوون خوەت دوویت وە سانێ
برقەێ گەردەنبەن گەردەن بلووران
عەقڵ و هووش دە سەر ئاێم دتووران
وە ناز و قەمزە یاروو قەزاڵ چەو
ئاێم دە ئێ خاو دوورد وە ئوو خاو
وەختێ باێ دیا زڵفێ دشێوان
شۊەڵەێ گووناێلێ دڵت دتێوان
شەماڵ واز دکرد یەقەێ کەتانێ
دووتی سەد خان بوو وە قوربانێ
جام مەی وە دەس سەوزەێ حەریر پووش
خوەێ دە مەی بەتر دە سەر دوورد هووش
مەی دکرد دەو جام زەڕین نگارە
هەێ دیا وە دەس ئەبووقەدارە
دووِت بفەرما حاکم سەر مەس
دنیا تا وە سەر نیەمینێ وە کەس
بنووش پەێاپەی دە ئێ شراوە
دەێ نقڵ و نەوات و جۊج و کەواوە
ئێ دنیا نەمەن وە کاووس کەێ
فڵەک سخانێ کرد وە قاپ نەێ
زەمان بارگاێ خوسرەو دا وە باێ
کەس شوون قەورێ هەم نەێرێ وە یاێ
شیرین و فەرهاێ دە یەک جگ٘ا کرد
جاماڵ لەیلی و مەجنوون سیا کرد
دامان یووسف دە پێشتەو چاک کرد
تا وە دە ئتهام زوڵەیخا پاک کرد
زەمین قۊتەو دا ڕوستەم وە ڕەخشێ
جز نامێ دەوە نەماگە نەخشێ
سپاێ سەڵم تووڕ ، موغوڵ  و تاتار
ڕشانە زەمین وێنەێ وەڵنگ دار
دەسگاێ خودایی نەمروود شەداد
کرد وە خوِڵەکوو دا وە دەس باد
گەنجەێل قاروون بردوو نەهان کرد
قاروون دە ورسی تەرک جەهان کرد
خان پوشتِکوو مەگەر نیەزانی
وە کی وەفا کەێ ئێ دنیاێ فانی
هەمە کەس زانێ دنیا بێ وەفاس
ئێ دنیا خوەێ هەم مەحکووم وە فەناس
بنووڕ وەو شمشێر زوموڕود کارە
ئێ زەڕ زیوەر جڵد قەدارە
ئوو خوم ڕەنگین پڕ دە شەراوە
ئێ بوویِ دۊدیِ کز و کەواوە
ئاەِ کەسانێ جناب والی
دەس ڕەسی نەێرن وە نان خالی
گەردەندەێ دەوران عەسەبانی کەێ
وە کل چەمەو دیدە بانی کەێ
یەێ جا دۊنی وە لێوە خەنەوە
جام مەی دە دەس تنیش سەنەوە
دە مِ هەم سینێ ئێ شکڵ شێوە
ئێ کەچی سەروەن و نازکی لێوە
ئێ قەدوو باڵاێ چۊ خەێزەرانە
ئێ زڵف کەمەند و ئەبروو کەمانە
ئێ سینەێ مەڕمەڕ و لیموو لەرزانە
ک ئافەت گیان پیر و جووانە
هەر کە چەمێ کەفت وەو باڵاێ بەردە
دە سەر تا وە پا دیارێگە لەرزە
هەر وەختی سووەێز دە ماڵ دێگەو دەر
زاهد و عابد کەفن دە خەتەر
ت نێۊش ئێ ساقی شیرین زووانە
داێە پیرەگەێ دەور زەمانە
هەر وەختێ دەوران کەسێ هاتەو سەر
وەێ فەنوو فیتە خوەێ مەخەێگەو دەر
دووگە عەرووسێ داێەێ کانەکار
خوەێ ئەڵڕازنێ چۊ گوڵ دە وەهار
وە جاێ مەی دەو جام زەڕین نگارە
هەێ زەهر دێدە خوەرد ئەبووقەدارە
دەوران حکمێ هاتگە ئەو سەر
خوەیشێ نیەزانێ چۊ هادە خەتەر
ڕزا خان هاتەو جۊ گەرتە چۊچان
لانەێ ئابادێ دە بن کرد وێران
غوڵام ڕزا نیشت وە خاک سیە
جاێ بۊ وە سمکووێ ئەسپ ئەمنیە
نازاران بێ ناز والی فەراری
سەرکردەێل کەفتن دە گرفتاری
عەێش بۊ وە عەزا ، تەخت بۊ وێرانە
بەڵێ ، یە وەفاێ دەور زەمانە
گەردندەێ دەوران هەم هادە کەمین
چەم گل دێ ئڕا یەسار و یەمین
بنیش تا بۊنیم هادە نشانە
ئێ جا هەدەفێ کام دوودمانە
ئێ دەورە نەوبەت کام نگوون بەختە
وە کام هەدەف خوەێ ئەو تیر سەختە
یە بۊ دەمتەقەێ تەڵخ تەختەسەنگ
تەختە سەنگ دڵم هەم هاورد وە تەنگ
چنە کەبیرکوو خەم کردە بارم
ئێ دەمەتەقە بۊ وه شکارم.




نوع مطلب :
برچسب ها :
لینک های مرتبط :
          
شنبه 5 تیر 1395
 
لبخندناراحتچشمک
نیشخندبغلسوال
قلبخجالتزبان
ماچتعجبعصبانی
عینکشیطانگریه
خندهقهقههخداحافظ
سبزقهرهورا
دستگلتفکر
نظرات پس از تایید نشان داده خواهند شد.





آمار وبلاگ
  • کل بازدید :
  • بازدید امروز :
  • بازدید دیروز :
  • بازدید این ماه :
  • بازدید ماه قبل :
  • تعداد نویسندگان :
  • تعداد کل پست ها :
  • آخرین بازدید :
  • آخرین بروز رسانی :
امکانات جانبی